Tolosa aculhís uèi una granda manifestacion per la lenga occitana, après que l’administracion francesa a mostrat sa volontat de suprimir la lenga nòstra de l’educacion publica. La crida a manifestar a lo sosten majoritari de l’occitanisme e es previst que fòrça mond de pertot en Occitània, dels Alps als Pirenèus, se recampen uèi tre 14h jos lo lèma “Pas d’Occitània sens occitan”.
Lo cortègi partirà a 14h de la plaça del Capitòli e passarà per la Carrièra de la Poma, la Plaça de Sant Jòrdi, la Carrièra Bolbona e la Plaça de Sant Estève. Aquí se depausarà una crida a la prefectura. Puèi contunharà per la carrièra de Mètz, la Carrièra d’Alsàcia-Lorena, la Carrièra Lafaieta e finirà tornarmai al Capitòli.