La Region Novèla Aquitània contra la reforma Blanquer ! / » Mes, qu’ei tota auta la realitat en region Navèra-Aquitània, com sus l’ensemble deus territòris dotats de lengas regionaus : la mesa en òbra de la refòrma deu licèu qu’a brutaument desvalorat l’atractivitat de l’ensenhament de l’occitan e deu basco en tant qu’opcion, per la baisha significativa deu coeficient au bachelierat e ua mesa en concurréncia aumentada dab las autas disciplinas. Las chifras de las rentradas escolaras 2019 e 2020 que son publicadas peus diferents Rectorats pertocats qu’an confirmat malurosament las cranhenças precedentament exprimidas, dab ua ahonida deus efectius e mei la supression e la precarizacion de las hialèras existentas dens establiments hòrt numerós.
Atau :
Per l’occitan :
– Los efectius cumulats de las rentradas 2019 e 2020 deus licèus publics que coneishen ua baisha significativa deu 32 % dens l’academia de Bordèu e deu 44 % dens l’academia de Limòtges. De notar que las academias de Tolosa e Montpelhièr que coneishen baishas mei importantas enqüèra.
– Nat ensenhament d’especialitat en occitan n’existeish uei dens l’academia de Limòtges e Bordèu.
Per lo basco :
– Opcion lenga basca dens l’ensenhament public : en licèu, los efectius cumulats per las rentradas 2019 e 2020 qu’acusan ua baisha deu 48 %.
– Ensenhament bilingüe dens l’ensenhament public e privat confessionau conhonuts : que s’ei amendrit lo taus de continuitat enter la 2nda e la 1èra enter 2019-2020 e 2020-2021 passant deu 80,7 % au 69,3 %.
– L’ensenhament d’especialitat LLCER que coneish chic de succès dens lo public e lo privat. Qu’ei abandonat enter la 1èra e la Terminau. En 2020, 15 eslhèves sonque e segueishen aqueth ensenhament d’especialitat en 1èra quan 9 eslhèves ac segueishen en Terminau.
« Adonc, com ac demandi despuish mantuns mes au Ministre e dens l’esper que sia adoptada a la prima que vien ua lei de proteccion de l’ensenhament de las lengas regionaus, qu’ei indispensable que tanlèu adara un esmendament e sia aportat a la refòrma deu bachelierat per autrejar a las lengas nostas lo quite estatut deu quau e benefician las lengas e culturas de l’Antiquitat. Que’n va de la lor subervita, pr’amor aquesta caduda objectiva deu nombre d’eslhèves en licèu qu’a consequéncias desastrosas suus efectius au còr de las universitats e qu’estareish quitament la hont potenciau de futurs ensenhaires bilingües que hèn necèra au desvolopament d’un ensenhament precòç de las lengas nostas.
Que s’ageish aquiu au pregon d’ua remesa en question de las politicas partenàrias que miam despuish mei de 10 ans au ras de l’Estat en mestior de desvolopament de politicas lingüisticas publicas en favor de las lengas regionaus, totun largament plebiscitadas peus conciutadans segon las recentas enquistas sociolingüisticas miadas suu nostes territòris » Comunicat de Charline Claveau, conselhèra regionau de Novèla-Aquitània delegada a las lengas e culturas regionaus.