Declaracion conjunta en rason dera celebracion dera Comission Bilaterau entre
era Generalitat de Catalonha e eth Conselh Generau d’Aran
Barcelona, 13 d’octobre de 2021
Era XIVau legislatura deth Govèrn dera Generalitat de Catalonha daurís ua naua
estapa de cooperacion institucionau damb era Val d’Aran e refortís era reconeishença
dera sua realitat nacionau damb er objectiu de trabalhar en melhorament dera qualitat
de vida des aranesi e es araneses.
Eth compromís deth Govèrn damb Aran ei enes arraïtzes deth prigond respècte pera
sua singularitat e eth sòn regim especiau, amassat ena Lei 1/2015, deth regim
especiau d’Aran (reforma dera Lei 16/1990), e que se tròbe en via de desplegament.
Ei damb aguest objectiu qu’era Comission Bilaterau entre era Generalitat de
Catalonha e eth Conselh Generau d’Aran, coma organ permanent de relacion entre
es govèrns dera Generalitat e d’Aran, s’amasse aué, 13 d’octobre de 2021, e apròve
era següenta declaracion:
Eth Govèrn dera Generalitat pren eth compromís d’un aument deth pressupòst de
transferéncia ordinària ath Conselh Generau d’Aran cossent damb naui traspassi de
competéncies e convènis.
Era concrecion deth trabalh conjunt e regular damb er impuls des trabalhs dera
Ponéncia mixta de traspassi e convènis, entà promòir e hèr seguiment de traspassi
de competéncies e foncions.
Reafirmam eth compromís mutuau de velhar entath supòrt ara lengua pròpria d’Aran,
en tot méter mès recorsi e esfòrci entà aumentar eth sòn usatge sociau, e era sua
coneishença, mès que mès entre es joeni.
Fin finau, comprenem qu’era lengua e era cultura aranesa an d’èster coneishudes
mès tà delà d’Aran e mès tà delà de Catalonha, atau coma tanben ac a d’èster era
sua realitat nacionau, naturau, territoriau e sociau, e per aguesta rason establiram es
canaus e es mejans de besonh entà ajudar en aguesta difusion.
Paratge e Convivència
