Una capitada pendent 20 annadas ! Ràdio, teatre, jornal, los occitans èran totis a l’escota o a la lectura, lo Carles Molin avia trapat la « Catinou » amb lo « Dominique » !
Après la guèrra, lo mond volián de jòia, mas tanben parlar dins la lenga nòstra mai que mai en dificultat subretot en vila. E Ràdio Tolosa aviá difusat cada setmana las aventuras de Catinon e Jacotin sens vergonha !
L’occitan e lo francés se mesclavan, coma dins la vida vidanta. Pensi qu’avem perdut quicòm dempuèi prèp de 60 ans..
« La Dépèche du midi » continuèt de far passar los tèxtes de Carles Molin pendent d’annadas mas Catinon e Jacotin s’ausiguèron pas pus a la ràdio. De còps foguèron jogats per de mond que volián far passar encara la lenga..
Dins aquela cronica vos pòdi pas escriure un tèxte de Catinon, seriá trop long. Mas vau enregistrar de cronicas sus Ràdio Lodeva. Poiretz escotar qualques istòrias dins las setmanas venentas.
Vos prepausi de legir (puèi d’escotar sus Ràdio Lodeva) un extrach d’una emission de Catinon e Jacotin :
« Qu’un prougrès ? » (grafia de Carles Molin)
Lou Julou qu’es tout plen calat qu’a toujoun lo nas dins los journals, a pas qu ‘aquel mot a la bouco : lou prougrès !
« De qu’un prougrès vos parlar ? Iou i disi. –Vous ne voyez pas tout ce qui a changé autour de vous, dans la manière de travailler et de vivre ?
– Oh ! Per aquo es plan segur que tot es cambovirat dins nostro vido aro que sèm moutourisats e mecanisats…Per un pauc tout se fario tout soul. Mès per aquel pauc que manquo lou moundo passo las journados a galoupar e a se batre amb lours mecaniquos. Lou tout es de saber se las causos van milhor per aquo. Per aquelis que las vendon sigurament, pels autris cal toujoun aber lou pourto mounedo a la man. »
Per la seguida, escotatz Ràdio Lodeva.
Zon al còp que ven, brave mond ! IEO ERAU