Imatge: Congreso de los Diputados
-
Eth passat 17 d’agost, era presidenta deth Congrès des Deputats, Francina Armengol, anonciaue qu’a compdar deth pròplèu Plen se poiran emplegar es lengües cooficiaus ena Cramba Baisha
-
Era sindica d’Aran, Maria Vergés, a sollicitat per carta ara presidenta deth Congrès qu’er aranés, lengua oficiau en Catalunya, tanben pogue èster emplegat en aguesta Cramba amassa damb eth catalan, er euskera e eth galhèc
Era sindica d’Aran, Maria Vergés, s’a adreçat ara presidenta deth Congrès, Francina Armengol, entà sollicitar qu’er aranés pogue èster emplegat en emicicle atau e coma, dempús qu’era presidenta anoncièsse qu’a compdar deth pròplèu Plen d’aguesta cramba s’i poiràn emplegar es lengües cooficiaus der Estat, eth catalan, eth galhèc e er euskera.
“Dempús de conéisher er anonci sus er emplec des lengues cooficiaus ena Cramba Baisha, hèt que celebram, mos trapam en déuer, morau e institucionau, de sollicitar qu’er aranés tanben pogue èster emplegat en Congrès”, afirme era sindica d’Aran ena sua missiva, a on a hèt tanben referéncia ar Estatut d?Autonomia de Catalunya e era Lei de Regim Especiau d’Aran que reconeishen era especificitat dera Val d’Aran e eth reconeishement der aranés coma lengua oficiau en Catalunya.
Atau madeish, era sindica d’Aran manifestaue que “eth reconeishement dera diversitat lingüistica en Espanha per part deth Congrès ei un gran pas ena promocion e proteccion des lengües minorizades, atau coma en respècte e consideracion as sòns parlants” e higie que: “permetent qu’er aranés se parle en emicicle s’amiarie a tèrme un pas significatiu entara proteccion, projeccion e reconeishement dera nòsta diuersitat culturau e era garantia que totes es votzes son escotades”.