Uèi es lo 1r de mai, jornada internacionala de las luchas obrièras e dels dreches socials. Per tota Occitània se tenon de manifestacions per reclamar de melhoraments de las condicions de trabalh, dels salaris, de las pensions e dels servicis publics. A Narbona, aquesta jornada pren una dimension encara mai fòrta: lo Recampament Nacional i organiza uèi sa reünion publica dins l’Arena, e una larga mobilizacion antifaissista s’es organizada en responsa.

De sindicats, d’associacions e de ciutadans engatjats cridan doncas a un grand acamp social, festiu e antifaissista amb un messatge clarament en occitan: “Lor petarem los cuols”. La jornada comença amb una manifestacion sindicala unitària a 11h davant la sosprefectura, seguida, tre 13h, de la dobertura d’un vilatge associatiu entre la Mediatèca e la Borsa del Trabalh.

Aquela segonda partida del jorn prepausa de debats, de concèrts, de taulièrs, d’animacions e de restauracion per totòm. Dos elements solidaris i seràn centrals: una gratifariá, ont se poirà donar e recobrar de vestits nets e en bon estat, e un obrador de serigrafia, per estampar lo messatge del 1r de mai sus la camiseta (cal portar una camiseta, de preferéncia clara).,  Info / JORNALET