Dempuèi 2018, La Passem es fòrça mai qu’una simpla corsa de relèu, es un eveniment popular e cultural que travèrsa cada dos ans lo territòri de Gasconha per celebrar e promòure la lenga e la cultura occitanas. En 2025, aquela dinamica s’espandirà en Albigés, gràcias a l’engatjament de l’associacion Ligams Tarn.
Lo principi es simple mas simbolic: un testimòni que representa la lenga occitana serà transmés de man en man a cada quilomètre. La corsa començarà lo 23 de mai a Sant Somplesi (Galhaqués) e s’acabarà l’endeman 24 a Albi. Aurà un trajècte de 230 km e passarà per de vilas coma Castras, Galhac o Còrdas. Aquel testimòni conten un messatge secret que serà pas desvelat abans l’arribada.
Aquela corsa serà tanben una fèsta itineranta. Tot long del trajècte, d’animacions culturalas auràn luòc, coma de concèrts, de danças, de rescontres, totas centradas sus l’occitan. D’associacions talas coma Calandreta, Òc-Bi, lo CRÈO, l’IEO o encara la Talvera uniràn lors fòrças per far viure la lenga per las carrièras e las rotas, e mostrar qu’Occitània es encara fòrça viva.
L’edicion gascona es venguda un succès. Dels 400 km de la primièra corsa de 2018, passèt als 1100 de l’edicion de 2024, traversant 300 comunas long de Bearn, Bigòrra, Comenge, Bas Ador, Lanas e Gèrs. Las tres edicions gasconas serviguèron per recoltar 215 000 èuros qu’an profechat a 46 projèctes diferents.
Per sosténer l’edicion albigesa de La Passem podètz aderir a l’associacion Ligams Tarn o ben far un don per mejan d’aqueste ligam.