Jos era devisa “Qui ten era lengua, ten era clau” —extrèta d’un poèma de Mistral—  era Corsa d’Aran per sa Lengua demòstre qu’era lengua ei un pilar fonamentau dera identitat aranesa

Coma cada darrèr dimenge de junhsèga, era Val d’Aran qu’ei un país en movement per usatge sociau dera lengua occitana. Aué, 27 de junhsèga de 2025, era Val d’Aran era Corsa d’Aran per sa Lengua que hestege eth sòn 31n anniversari. Er eveniment, non solament destaque era persistència d’ua revendicacion, mès tanben era capacitat deth collectiu Lengua Viua entà amassar a toti es aranesi, de quina ideologia que sigue, en ua luta comuna per usatge sociau dera lengua deth país en país.

Era corsa d’Aran per sa Lengua ei ua manifestacion revendicatiua ena quau fòrça aranesi trauèrsen era Val, a pè o en tot córrer. Es corsaires que gessen de Les, de Montgarri o deth Pòrt de Vielha, e que s’amassen ath ser en Vielha dauant deth monument ara lengua. Qu’arribaràn en tot carrejar es terçons, que permeteràn de diboishar era mapa dera Val ena plaça. Aquiu se i amassen normaument ues 1000 persones, e dempús des actes e des discorsi, un brave e animat concèrt de Nadau claue ua jornada que cada an ven istorica. Er eveniment qu’ei organizat peth collectiu Lengua Viua, entà revendicar er usatge sociau der aranés.

Era principau hònt de sòs entà finançar er eveniment qu’ei era venta dera samarreta dera corsa, qu’ena edicion d’enguan ei dissenhada per Maria Puyol.

Era corsa que compde cada an damb compatriòtes de Garona enjós, que vien tanplan a botjar-se peth nòste aranés, qu’ei, fin finau, er occitan de toti. Tanben i traparam era taula de merchandatge occitan de Macarèl e era der Ostau Comengés.

Aquera unitat des aranesi hè 31 ans que se manifèste cada darrèr dimenge de junhsèga e mos arribe damb toti es accents dera lengua occitana gràcies ara bona idèa de clauar cada an era corsa damb un concèrt de Nadau, qu’ei ara eth grop de musica mès popular d’Aran.

Jos era devisa “Qui ten era lengua, ten era clau” —extrèta d’un poèma de Mistral—  era Corsa d’Aran per sa Lengua demòstre qu’era lengua ei un pilar fonamentau dera identitat aranesa.