Mantun collectiu a lançat un apèl estatal a se mobilizar lo 10 de setembre venent en responsa a las darrièras copaduras socialas e a las politicas d’austeritat entamenadas pel govèrn francés. Segon lo comunicat, lo govèrn del bearnés Bayrou a accelerada una «ofensiva ultraliberala» en suprimissent 40 miliards d’èuros d’ajudas socialas, de dreches pels caumaires, pels retirats e pels estudiants, aital coma en remetent en causa los jorns festius e la setmana de 35 oras.
Los iniciaires de la protèsta denóncian una politica que respondriá pas a una necessitat d’austeritat, mas a una “guèrra de classa” menada d’ennaut, en soslinhant que los esfòrces son totjorn exigits als mai paures, mentre que los beneficis dels mai rics contunhan d’aumentar. L’apèl emana de grops anonims, fòra dels partits e sindicats, e compara la situacion actuala a la debuta del movement dels Gilets Jaunes.
Lo comunicat met endavant las donadas de l’INSEE sus l’agravacion de las inegalitats dins l’estat francés, e avertís de la volontat del govèrn d’anar encara mai luènh dins la precarizacion de la populacion al profièch d’una minoritat d’ultrarics. Regèta tanben tota temptativa de recuperacion per l’extrèma drecha, e insistís sul fach que lo vertadièr motor del cambiament pòt venir solament de la basa e fòra de las estructuras tradicionalas.
Los organizaires cridan a davalar per carrièras, a passar a l’accion e a s’organizar per exprimir una oposicion a una societat «dels rics pels rics», tot en reconeissent que los astres d’un movement de massa son limitats pel contèxt actual de repression e de division sociala. Info / JORNALET