Un novèl espaci dedicat a la lenga e a la cultura occitanas dobrirà sas pòrtas a Narbona, çò rapòrta L’Indépendant. Batejat «lo Còp», aquel pòl cultural serà inaugurat deman 15 d’octòbre de 2025 al 50 de l’Avenguda del General Leclerc, dins l’anciana casèrna Montmorency. Lo public es convidat a participar a las primièras festivitats los 16 e 17 d’octòbre a partir de 17 h.
Portat per l’associacion Bastissèm Occitan Narbonès, lo Còp a per vocacion de far viure e transmetre l’occitan a totas las generacions. Lo dijòus, los mainatges seràn a l’onor amb de contes e de filmes d’animacion. Lo divendres, plaça a la convivialitat amb vin, castanhas uscladas, un “kara’òc”, de cançons e de musica tradicionala. Una exposicion suls mots occitans e de jòcs de fusta vendràn completar las animacions.
Tot long de l’annada, lo Còp prepausarà d’eveniments culturals en ligam amb las sasons, coma Martror, Nadal o encara lo carnaval. Un espaci de lectura e d’escota en occitan i es tanben previst per rendre accesible a totòm de lecturas e musicas en occitan. Amb son simbòl, lo papagai, lo Còp espèra de venir un luòc viu e immancable de la lenga nòstra a Narbona.
Bastissèm Occitan Narbonès es una federacion d’associacions engatjadas per la lenga occitana, coma lo Movement de las Calandretas, la Compagnie de la Loue, lo Teatre dels Ad’òc e Convergencia Narbonesa. Lo Còp benefícia del sosten financièr de la comuna e de l’aglomeracion de Narbona, del Narbona, aital coma del departament e de la region.