Lengadòc: controvèrsia pel cambiament de nom dels “castèls catars” en “fortalesas reialas”
País Nòstre denóncia “una inversion memoriala, que mena a glorificar los opressors e far oblidar las victimas”
Tèxte legit
Lo projècte de renomenar los tradicionals “castèls catars” de Lengadòc coma “fortalesas reialas” a fach nàisser una viva polemica dins lo mitan cultural, istoric e identitari occitan. Aquel cambiament de nom es oficialament degut a la candidatura d’aqueles sits al patrimòni mondial de l’UNÈSCO.
De Montsegur a Pèirapertusa, en passant per Querbús, Tèrmes, Puèglaurenç o Las Tors, aqueles castèls emblematicas pòrtan totes la memòria d’un meteis drama: al sègle XIII, lo poder reial francés e la Santa Inquisicion menèron una guèrra sens pietat que, jos l’escampa de combatre lo catarisme, menèt a de sètges, de massacres e de persecucions. Montsegur n’es l’imatge mai conegut: en 1244, mai de 200 òmes e femnas i foguèron cremats vius après la reüssida del sètge. Pasmens, d’autres sits del país coneguèron tanben la fòrça armada e la repression.
Segon los promotors del projècte de l’UNÈSCO, l’expression “castèls catars” seriá istoricament impròpria, pr’amor que la màger part d’aquelas fortalesas foguèron bastidas o transformadas pel poder reial après la Crosada contra los albigeses. D’aquí la volontat d’impausar lo tèrme «fortalesas reialas de Lengadòc».
Mas aquela causida es fòrça contestada per las associacions culturalas e de militants occitanistas, coma lo collectiu País Nòstre. Per eles, d’escafar lo mot catar dins l’apelacion d’aqueles sits torna escafar una part essenciala de la memòria istorica. “Es una inversion memoriala, que mena a glorificar los opressors e far oblidar las victimas”, çò denóncian.
Delà lo debat terminologic, la question pausa un enjòc fòrça mai prigond: quin raconte de l’istòria volèm transmetre? Una lectura estrictament militara e reiala, o una vision que ten compte de las resisténcias, las persecucions e l’identitat pròpria del país occitan?
Una peticion circula ja per defendre lo mantenement del nom istoric de “castèls catars”. La decision finala de l’UNÈSCO es esperada dins los meses avenidors. Mentretant, lo debat sus la memòria, l’istòria e l’identitat de Lengadòc se manten mai viu que jamai.
JORNALET del 11 de decembre de 2025 .
Peticion sus Change.org per defendre l’apelacion de “Castèls catars”