Dimècres passat, 18 de febrièr, se passèt una coïncidéncia rara: lo començament simultanèu de la Quaresma per fòrça crestians e del Ramadan pels musulmans. Dos periòdes màgers de l’annada religiosa que, malgrat las diferéncias doctrinalas, partejan una meteissa dimension esperitala.
Lo periòde de Quaresma comença lo Dimècres dels Cendres e dura quaranta jorns fins a Pascas. Per las personas cresentas, es un temps de conversion interiora, de pregària e de caritat, ont fòrça fidèls practican lo june o l’abstinéncia. Per quant al Ramadan, noven mes del calendièr estrictament lunar islamic, commemòra la primièra revelacion recebuda pel profèta Maomet e s’acompanha d’un june quotidian de l’alba fins al solelh colc, amb una fòrta dimension de solidaritat.
Ongan, en mai d’aquò, aquela concomitància pertòca tanben la fe bahā’ī, que celèbra dins lo meteis periòde, del 2 de març enlà, lo mes de june, temps de pregària e de renovacion esperitala abans la fèsta de Nawrūz, lo cap d’an persan qu’a luòc a l’equinòcci de prima.