Es acabada amb grand succès la corsa La Passem dins sa primèra edicion al còr de Lengadòc, dins lo departament de Tarn, après aver percorreguts 230 quilomètres entre Sant Somplesi e Albi. Sal sonque veire los rets socials per constatar que la mobilizacion populara es estada reüssida.
La corsa populara per la transmission de la lenga a mobilizat tot l’occitanisme d’Albigés aquesta dimenjada
Organizada per l’associacion Ligams Tarn, aquesta edicion albigesa confirma lo vam pres per la corsa en Gasconha dempuèi 2018, amb una participacion massissa e un ambient festiu que fa ressonar la lenga e la cultura occitanas per carrièras, per estradas, per vilas e vilatges e mai que mai per escòlas.
Dempuèi divendres, s’i son mobilizats de militants, de calandrons, d’escolans d’endacòm mai, de collegians, de liceans, d’artistas, de musicians e de collectius coma Dètz o Piget, dins una celebracion populara marcada per l’intergeneracionalitat, l’estrambòrd e lo paratge. Cada quilomètre es estat l’escasença de transmetre lo testimòni de La Passem —que conten un messatge secret— de man en man, coma simbòl de la vitalitat de l’occitan al territòri.
La corsa a traversadas de vilas emblematicas coma Castras, Galhac, Còrdas e Albi, e tot long del percors s’i son tengudas d’animacions culturalas: de concèrts, de balètis, de danças tradicionalas, de taulièrs d’associacions e de moments de sensibilizacion a la lenga. Lo collectiu organizaire a pogut comptar sul sosten de fòrça entitats coma Calandreta, Òc-Bi, lo CRÈO Tolosa, l’IEO Tarn, la Talvera, entre plan d’autras.
Saludam calorosament Ligams Tarn e totes los benevòls qu’an fach viure aqueste eveniment amb una energia comunicativa. Esperam ara amb impaciéncia las chifras finalas de participacion e de collècta solidària, per conéisser l’impacte social e economic d’aquesta edicion. Un còp de mai, La Passem a demostrat que la corsa es fòrça mai qu’un eveniment esportiu: es un moviment popular per l’occitan.
Ara, sonque podèm desirar que i a ja de corsas per la lenga occitana per tot lo país nòstre.
Per sosténer l’edicion albigesa de La Passem podètz aderir a l’associacion Ligams Tarn o ben far un don per mejan d’aqueste ligam.