De personas vengudas de tota Occitània e d’endacòm mai se manifestèron ièr dissabte per las carrièras de Vilafranca de Roergue dins l’encastre d’una dimenjada de revendicacions en defensa de la lenga e l’identitat occitanas, en seguida de la crida del collectiu Carrièras Occitanas.
La jornada de dissabte foguèt marcada per d’accions simbolicas, coma l’occitanizacion temporària de la senhaletica e lo retirament de panèls monolingües en francés. En mai d’aquò, los participants bastiguèron un ostal de fusta en omenatge a Joan Petit, personatge istoric e popular qu’en 1643 foguèt executat en plaça publica a Vilafranca, amb la tòca de lo plaçar dins lo meteis endrech ont foguèt destruch. La causida de Vilafranca de Roergue respond a una volontat de tornar metre en lum aquel episòdi istoric, considerat coma un simbòl de resisténcia populara. Las consignas e eslogans prononciats pels manifestants insistiguèron sus la necessitat de “descolonizar” lo país e de revendicar la memòria e la preséncia publica de la lenga.
La dimenjada revendicativa contunha aqueste dimenge amb d’assembladas, de presas de paraula e d’activitats culturalas.
Avèm pas encara de chifras oficialas de participacion mas podèm dire que l’eveniment es una capitada de las bèlas, malgrat las dificultats objectivas, coma lo fach que Vilafranca de Roergue siá pas la vila pus aisida d’accedir dempuèi la rèsta del país o encara l’organizacion exprèssa començada aqueste estiu sens gaire de sosten occitanista oficial.
INFO / JORNALET .