A Nòva York, Zohran Mamdani, de 34 ans, es estat elegit cònsol màger amb mai o mens lo 50 % de las voses, venent lo primièr cònsol màger musulman, lo primièr d’origina sud-asiatica —sortit precisament d’una familha d’origina indiana— e lo mai jove dempuèi mai d’un sègle a dirigir la vila, çò rapòrta Los Angeles Times. Nascut en Oganda, amb lo ciutadanatge estatsunidenc dempuèi 2018, Mamdani, encara inconegut fa un an, mòstra una ascension politica fulguranta e una rompedura amb los elèits tradicionals.
Ancian deputat democrata socialista de l’estat de Nòva York, a batut l’èx-governador Andrew Cuomo e lo republican Curtis Sliwa gràcias a una campanha centrada sus la justícia sociala, l’accès al lotjament e la gratuitat dels servicis publics. Son programa ambiciós —gratuitat dels buses, creacion de comèrcis municipals e de servicis d’urgéncia sens polícia— sedutz una bona part de l’electorat, mas suscita tanben de dobtes sus son finançament, sustot demest los economistas e los responsables municipals, que jutjan sas proposicions de mesa en plaça malaisida sens aumentar los impòstes.
Cossí que siá, aquela victòria s’inscriu dins una serada trionfala pels democratas. Abigail Spanberger, anciana oficièr d’entresenha de la CIA, es venguda la primièra femna governadora de Virgínia, mentre que l’èx-luòctenenta de vaissèl Mikie Sherrill es elegida governadora de Nòva Jersey.
Aquelas victòrias, observadas coma un baromètre del clima politic del país, constituisson una revirada per Donald Trump, dont los candidats an pas capitat a s’impausar. Confirman tanben la bona tenguda del Partit Democrata que semblava endormit, ara reviscolat per un discors mens centrista e mai progressista e per l’aument de la participacion electorala, signe d’una mobilizacion creissenta de la societat fàcia a las politicas brutalas del miliardari ultradrechista que presidís los Estats Units. Mamdani especialament, caricaturat per Trump que lo qualifica de «comunista» e d’«antisemita», encarna una bona part de çò que l’asira lo president sostengut per de nacionalistas crestians populistas, reaccionaris e xenofòbs: es musulman, pròpalestinian, socialdemocrata, progressista, sortit de l’immigracion e d’una familha d’intellectuals e universitaris.