Jean-Charles Valadier e Joan Francés Laffont
A l’iniciativa de Convergéncia Occitana, un debat public consagrat a l’avenidor de la lenga e de la cultura occitanas foguèt organizat aqueste diluns 17 de febrièr a Tolosa, en preséncia de representants de las principalas listas per las eleccions municipalas de març de 2026.
Lo collectiu Convergéncia Occitana, que recampa un seissantenat d’associacions occitanas del país tolosan, aviá mandat en amont als candidats un document (ligam dins lo fichièr) de proposicions fòrça detalhat sus lo desvolopament de l’occitan dins la vila. L’encontre foguèt l’escasença d’interpelar concretament los responsables politics sus quatre aisses: promocion de la lenga; sosten a la creacion culturala; transmission e educacion; vida associativa.
Quatre listas èran representadas: majoritat sortenta (Jean-Luc Moudenc), Esquera Unida (François Briançon), LFI (François Piquemal), Sens Etiqueta (Pierre Pezzin)
La majoritat sortenta del cònsol màger Jean-Luc Moudenc foguèt representada per son adjunt Jean-Michel Lattes. Aqueste metèt endavant las realizacions de la mandatura, coma lo sosten a las calandretas o la preséncia de l’occitan dins lo tram, e anoncièt de projèctes novèls, entre eles l’extension de las anóncias en occitan dins las linhas estructurantas de bus LINÈO e la creacion d’una veirina grand public sus l’istòria occitana dins lo centre vila.
L’oposicion d’esquèrra e dels ecologistas foguèt representada per lor cap de lista, François Briançon, que defendèt una politica culturala transversala e la dobertura progressiva de filièras bilinguas publicas, en ligam amb lo rectorat. Prepausèt tanben d’afortir lo sosten financier a las associacions, e de transformar la torre màger del Capitòli, qu’abriga actualament l’ofici del torisme, en espaci dedicat a l’occitanitat de la ciutat.
La representanta de La França Insomesa, Linda Terrier, insistiguèt de son costat sus una politica mai volontarista en favor de la diversitat lingüistica, amb una reorientacion dels finançaments cap al mond associatiu, inclusent lo sector occitan.
Pierre Pezzin, sostengut per Bastir Occitània, insistiguèt sus la memòria de la Crosada e l’identitat tolosenca.
En conclusion, Joan-Francés Laffont soslinhèt un punt comun entre las quatre listas: la volontat partejada de refortir la preséncia de l’occitan, tant sus lo plan cultural coma educatiu. Totes s’acòrdan tanben sus l’idèa de crear dins lo centre de la vila un centre d’interpretacion dedicat a l’istòria e a la civilizacion occitana, pensat coma pòrta d’intrada de Tolosa per los residents e vesitaires.