Eth Parlament de Catalonha qu’aprovèc agèr dimèrcles era lei sus era reconeishença dera Val d’Aran, impulsada pes grops deth PSC, de Junts, d’ÈRC, des Comuns e dera CUP. Eth tèxte vò refortir eth ròtle deth Parlament coma garant der autogovèrn aranés e assegurar qu’era singularitat deth país occitan de cap de Garona age ua aplicacion practica laguens der encastre legislatiu catalan.
Era lei s’aprovèc damb 109 vòtes a favor, 11 contra de Vox e 15 abstencions deth PP. Es grops proposants coïncidiren qu’era lei aprovada responie a ua demana istorica dera Val d’Aran e que suposaue un pas entà consolidar er autogovèrn e era personalitat institucionau deth Conselh Generau d’Aran.
Es deputats que soslinhèren qu’era nòrma aprovada auie era tòca d’evitar era confusion deth Conselh Generau d’Aran damb es administracions locaus ordinàries e garantir-ne es competéncies pròpries. Tanben reclamèren un finançament sufisent entà hèr efectiu er autogovèrn e valorèren era aprobacion coma un pas important ena reconeishença politica e juridica dera singularitat aranesa.