Lo Comitat del Patrimòni Mondial de l’UNÈSCO a inscrich l’ensemble dels castèls de Lengadòc coneguts popularament coma castèls catars sus la lista del Patrimòni Mondial. Pasmens, l’organizacion los a enregistrats oficialament jol nom de «Fortalesas reialas capecianas de Lengadòc», una denominacion que cèrca d’escafar la memòria istorica d’Occitània.
Lo sit classificat recampa uèch monuments: la Ciutat e las muralhas de Carcassona e las fortalesas d’Aguilar, de Las Tors, Montsegur, Pèirapertusa, Puèglaurenç, Querbús e Tèrme. Segon l’UNÈSCO, aqueles monuments constituisson un ensemble defensiu bastit per la monarquia capeciana après la Crosada amb la tòca d’impausar son autoritat sus Lengadòc.
La decision foguèt plan aculhida pels que trabalhan per la conservacion d’aqueles monuments, pr’amor que lo labèl de Patrimòni Mondial deuriá facultar la proteccion dels sits e favorir lo desvolopament economic de las zònas ruralas pertocadas.
Totun, la denominacion oficiala es criticada per d’organizacions occitanistas. Per elas, de metre d’en primièr la dimension «reiala capeciana» equival a privilegiar lo ponch de vista dels venceires de la Crosada e a relegar la memòria dels catars, de la resisténcia occitana e de l’annexion violenta del Comtat de Tolosa al Reialme de França. Una peticion ciutadana e de mobilizacions, jos la devisa «Gardarem los castèls catars», demanda de servar la referéncia tradicionala als castèls càtars, e a recampadas mai de 9000 signaturas.
Los responsables de la candidatura respondon que l’expression «castèls catars» es istoricament imprecisa. Ramentan que las fortalesas visiblas uèi foguèron, en granda part, bastidas o totalament reconstruchas pels reis capecians après la conquista del país. Lo nom retengut per l’UNÈSCO correspondriá donc a la realitat arquitecturala dels edificis, sens refusar l’istòria de la Crosada ni la repression que foguèt exercida contra lo pòble occitan.
Pasmens, delà la valor patrimoniala dels monuments, la denominacion de « Fortalesas reialas capecianas de Lengadòc» escafa la memòria dels grands simbòls de la memòria istorica de Lengadòc.