Lo prèmi Robèrt Lafont, en sa setzena edicion, es estat atribuit a Calandreta, lo ret d’escòlas associativas d’immersion en occitan implantat per tota Occitània. La jurada prenguèt la decision a l’unanimitat demest quatre candidaturas presentadas.
Los membres de la jurada reconeguèron totes l’implantacion territoriala de las calandretas, lo trabalh dempuèi longtemps realizat per l’ensenhament de l’occitan e lo fach que lo projècte implique un collectiu plan larg sul territòri, aital coma son impacte sus d’autras entitats consagradas a la lenga.
Lo conselhièr —ministre regional— F. Xavier Vila, president de la jurada, soslinhèt era accion de las escòlas associativas occitanas: «Calandreta a hèt a vier era escòla en un espaci a on er occitan non ei solament objècte e miei d’aprendissatge, mès qu’ei tanplan un estrument de socializacion, veïcul de coesion e part essenciau dera identitat des escolans».
Una ceremònia tota en occitan
L’autrejament del prèmi se tenguèt ièr dijòus dins l’encastre d’una ceremònia tota en occitan, presidida pel conselhièr e presentada per la jornalista aranesa Ares Riu, amb las intervencions de Joan-Loís Blenet, president de Calandreta, de l’occitanològ Jaume Figueras e de l’artista marselhés Rodin Kaufmann.
Instituit en 2010
Lo prèmi Robèrt Lafont de la Generalitat de Catalonha foguèt instituit en 2010. Los laureats de las edicions anterioras son Pèire Bèc (2010), Felip Gardy (2012), Jacme Taupiac (2014), la Fondacion Musèu Etnonologic dera Val d’Aran (2016), Georg Kremnitz (2018), Frederic Vergés (2020), Xavier Lamuela e Lissa Escala ex aequo (2022) e Fredo Valla (2024). Aquel guierdon se decernís a las personas o entitats remarcadas per las defensa, projeccion e promocion de l’occitan, lenga oficiala dins tot lo Principat de Catalonha dempuèi 2006 per que sián garentits los dreches dels ciutadans d’Aran. F . Macip JORNALET