Mai d’un milièr de personalitats, elegits, intellectuals, avocats, universitaris e sindicalistas e d’autres ciutadans de l’estat francés an fach una crida per la liberacion dels presonièrs politics catalans e per la defensa « de la democracia, del drech de vòte e del drech de decidir liurament ».
Concretament, las peticions dels signataris son:
— La liberacion immediata dels presonièrs politics catalans e de totes los encarcerats per lors opinions politicas, e lo respècte de lor drech de decidir.
— Lo retirament de totas las acusacions que se presentan contra eles e contra los que se son exiliats, e tanben la fin de la persecucion de la justícia contra totes los ciutadans qu’exercisson lor libertat d’expression.
— Una crida a totas las personalitats, responsablas e ciutadans franceses engatjats pel respècte dels dreches democratics per que signen e fagan signar aquela declaracion.
La peticion es adreiçada a Fernando Carderera Soler, ambaissador de l’estat espanhòl a l’estat francés.
Demest los signataris i a mai d’un politician actiu coma los deputats de l’Assemblada Nacionala francesa Paul Molac, Muriel Ressiguier e Eric Coquerel, la senatritz Esther Benbassa, los eurodiputats José Bové e Marie-Pierre Vieu, l’èx-vicepresident del Parlament Europèu, Gérard Onesta, e los èx-candidats a la presidéncia francesa Noël Mamère, Olivier Besancenot e Philippe Poutou. An tanben signat aquela iniciativa divèrses conselhièrs regionals e caps sindicals.
Podètz signar e consultar la lista de totes los signataris sus aqueste ligam.
INFO / LO JORNALET