La manifestacion contra la supression de l’occitan dins l’educacion publica, que se tendrà lo 17 de febrièr venent, calfa los motors. Organizada pel Centre Regional dels Ensenhaires d’Occitan de Tolosa (CRÈO Tolosa) amb lo sosten de la FÈLCO e de Calandreta, la protèsta ten mai d’un sosten dont l’IEO, Convergéncia Occitana, d’autras associacions occitanistas e plusors elegits. En mai d’aquò, divèrses acamps de protèsta se son ja tenguts e la cauma generala de dimars passat comprenguèt tanben una bona preséncia d’ensenhaires d’occitan a Tolosa, Rodés, Tarba, l’Isla de Baish…
Los detalhs del cortègi
Lo CRÈO Tolosa anoncièt ièr los detalhs de la manifestacion dins una conferéncia de premsa a l’Ostal d’Occitània de Tolosa. Lo cortègi partirà lo 17 de febrièr a 14h de la plaça del Capitòli e passarà per la Carrièra de la Poma, la Plaça de Sant Jòrdi, la Carrièra Bolbona e la Plaça de Sant Estève. Aquí se depausarà una crida a la prefectura. Puèi contunharà per la carrièra de Mètz, la Carrièra d’Alsàcia-Lorena, la Carrièra Lafaieta e finirà tornarmai al Capitòli. ( LO JORNALET )