La lenga occitana dins los sits web de la Generalitat de Catalonha

La lenga occitana s’incorpòra progressivament dins los diferents sits web de la Generalitat de Catalonha, e sos rets socials. Demest los diferents sits meses en òbra en occitan d’Aran, ven de s’anonciar lo del Departament de la Cultura de la Generalitat. Al total son mai de 300 paginas web traduchas en lenga nòstra, una lenga qu’es oficiala en tota Catalonha dempuèi 2006.

La version occitana d’aquel sit arriba en seguida de la decision que la prenguèt lo govèrn de la Generalitat l’11 de març de 2019, après la primièra reünion de son conselh executiu facha en Aran. Se decidiguèt de favorizar l’usatge de la lenga occitana dins l’encastre institucional de la Generalitat e dins sos elements de comunicacion coma los diferents sits web del govèrn catalan e de sos organisme, dels autres canals d’informacions e dels rets socials.

Dins aquel sens, la Direccion Generala de la Politica Lingüistica a mes creat un compte de Twitter en lenga occitana: @occitan_aranes.

. INFO /  LO JORNALET .