| Comunicat dau CTLA (Collectiu dels Teatres en Lengas Autoctònas)
Aquest 9 d’agost sarà per l’UNÈSCO “Jornada Internacionala dels Pòbles Autoctòns”. De mai, au mes de genièr, l’Amassada Generala de l’ÒNU proclamava 2019 “Annada das Lengas Autoctònas”. L’autoctonia concernís França tota e pas sonque sas possessions alunhadas. Las lengas dichas “regionalas” son las lengas autoctònas d’una bèla part de l’espaci metropolitan de la nòstra Republica. Los 18 e 19 de julh de 2019, dins l’encastre dau festenal L’Estivada portat per la vila de Rodés, lo prumièr rescontre dels teatres en lengas regionalas a permés de fondar un collectiu, lo CTLA: Collectiu dels Teatres en Lengas Autoctònas. Aquesta acampada es una primièra e fuguèt organizada per respondre a l’estat d’urgéncia ont se trapan aqueles teatres a l’ora d’ara. Las companhiás d’aquestes teatres son d’actors dels terraires e òbran per faire tindar lor creativitat dins lors lengas maltractadas. L’objectiu es de se ganhar lor plaça legitima dins lo païsatge artistic, cultural, audiovisual e institucional francés. I a un besonh, una realitat, una demanda sociala e aquestas companhiás se recampan per obténer un avenidor per la creacion dins las lengas autoctònas del nòstre país. |