“Amé lei licèus la Region a lo drech de pagar lei murs de la cantina escolari mai pas d’i entraïnar una cuina sana”. Anne-Marie Hautant siguèt elegida dau Consèu Regionau de Provença Aups Còsta d’Azur entre 2010 e 2015, e jamai a poscut faire intrar dins lei cantinas de licèus lei produchs de la paisanariá amé d’afichas en lenga nòstra. L’Estat decida, la Region paga...”Es un guichet e pas mai, e volèm reabilitar lo ròtle de nòstrei Regions, sacrificadas dei lèis de “decentralisacien”, jutge Pèire Costa, que bailèja la campanha electorala de “Oui à la Provence”.

Lei regionalistas an decidit d’anar am’ un programa vertadièrament regionalista, e d’un biais autonoma, dins aquela campanha que deuriá acabar en junh am’un Consèu Regionau renovelat. Acabada l’aligança amé leis ecologistas politics ? A vèire, mai “volèm que la votz dei regionaus s’auça e dire ce que volèm” sotalinha Pèire Costa.

Per son premier exercici de comunicacien, a mieg janvier avian sollicitat Arvei Guerrera, eu tanben elegit entre 2010 e 15, e grand enemic dau novèu biais de dire la Regien “Sud”, am’ una peticien en linha qu’arriba ai quaranta milas signataris. Tanben Tricio Dupuy, bailèssa dau mesadier Prouvenço d’Aro, Michèu Prat, militant culturau deis Aups, o Cristòu Daurore, tot parier a Niça ; e encara de monde de la societat civila, coma Didier Cade, que s’acara despuei d’annadas au projèct de linha a granda velocitat entre Marselha e Niça.

Justament, per eu lo projèct de TGV localament illustra ben la problèmatica regionala. Lo projèct tant vòugut per l’ancian president regionau Christian Estrosi, avança…silenciosament. Deuriá saquejar la Provença agricòla, e lei finanças publicas segon Didier Cade, e mai que tot avança sensa reclama : “La Comissien Nacionala dau Debat Public ne’n farà pas un grand debat (que pasmens la Lèi li ne’n fariá obligacien !), amb aquò lo monde serà pas informat e aurà pas a dire son biais de vèire”…en mai d’aquò lo plan de reviscolament economic ligat a la crisi sanitari podriá ben pagar ce qu’es vist coma una catastrofa territoriala e ecologica per lo president de Stop LGV Sud Sainte Baume.

Oui la Provence deuriá contunhar son plan de comunicacien sus aquela dralha : lo recampament de monde implicat dins lei luchas territorialas, amé la volontat de faire de la Regien un vertadier luec de debat e decisien.

Info / AQUO D’AQUI .