Coma o sabètz lo mes de setembre es la debuta vertadièra de l’an novèl plan mai que l’oficiala. Cambiar d’an en quauques minutas tre que pas res càmbia, es pro artificiau. Au contre, aquí i a un temps de pausa pro long entre l’an vièlh e lo novèl que s’aprèsta dins l’estiu. Es temps ont las institucions alestisson las règlas novèlas. Lo gas costarà mai, tarifas e allocacions càmbian, los mèdias modifican lors grasilhas de programas, es la debuta de l’an literari, teatrau, te sabi ieu. Es plan l’estivada que parteja las annadas. Adoncas espèrs e desirs de bona annada a totis. Per las lengas istoricas coma nòstra lenga d’òc, l’actualitat serà cremanta aprèp la Fatwa contra lo remplec dins las escòlas. Amb aquò l’an serà tot de fèbre politica per l’eleccion màger, la presidenciala, temps pesugàs de polemicas laiantas. Per far contrapè qué de melhor que de començar amb un libre excellent, DOROTÈA, de Georges Nespoulous ? Es editat dins las doas lengas per « L’Aucèu Libre » que fa de tan bon trabalh. Un roman originau dins sa forma qu’es l’enquèsta d’una jove professora d’istòria sus la Resisténcia e sa familha. Una lenga modèrna, plegadissa, que conta nòstre temps amb una naturalesa que fa sentir qu’es sempre la lenga normala d’aquel país. Un grand plaser per prene lo vam de l’an novèl.
J.L BLENET MIDI LIBRE