Nos a quitats Gèli Grande, militant occitanista e copresident del Partit de la Nacion Occitana. Afogat del rugbi, de la literatura e del cinèma, e tanben poèta, escriviá de cronicas per Lo Lugarn, teniá una tribuna dins Jornalet, fasiá una cronica rugbistica sus Ràdio Lengadòc e una cronica onomastica dins l’emission occitana Adishatz de Ràdio Entre Duas Mars en Gironda. Collaborava fòrça activament amb la calandreta d’Agen.
Gèli Grande nasquèt fa 68 ans en Tunisia, d’un paire de soca italiana e d’una maire d’origina espanhòla. Arribèt en Occitània en 1957. En 1969, descobriguèt l’occitanisme e abracèt lo nacionalisme descolonizaire de Francés Fontan.
Tresvirats per aquesta marrida nòva, la còla de Jornalet planhèm sincèrament lo dòl de Janina Cazes e totes los parents, amics e camaradas de Grande.
Jornalet del 10 / 1 / 2022 .