Amb lo partit Résistons ! de Joan Lassalle, tres candidats gessits de la lista a las regionalas « Bastir Occitània » se presentan cap de lista a las eleccions legislativas de 2022 en Garona Nauta. S’agís de Jiròni Picas (5ena ; suplenta : Linda de Lorenzo), de Sylvie Bonnemaison (6ena) e de Angelique Eymond (7ena).Amb la labelisacion de PAIS NOSTRE.
Dins la cinquena circonscripcion, que regropa los cantons de Cadors, Fronton, Granada de Garona, Tolosa-XIII e Vilamur de Tarn, lo candidat Jiròni Picas (suplenta Linda De Lorenzo, que t’èra ela tanben dins la lista « Bastir Occitània » l’an passat), es uèi investit pel movement de Joan Lassalle. Un primièr contacte ambe Résistons ! foguèt pres al moment de la candidatura de Jiròni Picas a las eleccions legislativas en 2017, quand t’èra partit identificat a l’epòca « regionalista occitan » coma candidat del Partit de la Nacion Occitana (PNO) labelizat « Bastir Occitània ».
Jiròni Picas defend demest sas idèas de redusir lo milafuèlhas territorial, al nivèl economic de favorizar los camins corts, o encara de botar en plaça un « tiquet païsan », sul principi del tiquet restaurant, en encoratjant a crompar directament als productors locals ; al nivèl escolar : de generalizar l’ensenhament d’una segonda lenga tre l’escòla primària, la lenga regionala locala o una lenga estrangièra (a la causida dels parents).
Linda de Lorenzo e Jiròni Picas.
