Aquela annada encara, los/las professor.as d’occitan en licèu trobèron dins lor casièr un magazine tot en occitan a destinacion de lors escolans.
Aquel magazine, es Lo Diari dins una edicion especiala revisitada pels/per las licean.a.s que tracta exclusivament de tematicas qu’interèssan aquel public. Es ofèrt per l’Ofici public de la lenga occitana (OPLO) a totes e totas los/las escolan.as occitanistas de las Regions Novèla Aquitània e Occitània. L’operacion es desplegada en direccion dels 64 establiments que prepausan l’opcion occitan.
A travèrs aquela distribucion, l’OPLO cerca a diversificar las ressorsas d’utilizar en classa e a respondre atal a un besonh exprimit pels ensenhaires.
Renovelament de l’accion dins l’encastre de la Setmana de la premsa e dels mèdias a l’escòla
Ongan annada, l’operacion es estada pensada per se poder inscriure dins l’encastre de la Setmana de la premsa e dels mèdias a l’Escòla - CLEMI del 27 de març al 1èr d’abril de 2023. En efièch, l’ensenhament de las lengas vivas e de l’occitan en particular, constituís tanben una oportunitat vertadièra d’abordar l’educacion als mèdias amb los/las escolan.as.
Lo Diari : magazine cultural tot en occitan
Lo Diari es un magazine bimestral cultural d’un 40at de paginas, tot en occitan. Es editat dempuèi 2008 per l’IEO OPM e seguit per una comunautat de mai de 2500 lector.as sus tot lo territòri occitanofòne. Aquel segond fòra seria tracta de subjèctes precises, que parlan a la joventut, coma los mangas o los jòcs vidèo, las aplis, las serias de veire en streaming, la musica… Coma los autres numèros, prepausa un esclairatge modèrne sus l’actualitat, en tot portar una atencion particulara a la creativitat e a la qualitat grafica dels contenguts.
Aquela operacion serà renovelada per 3 annadas escolaras.