Los 5 e 6 d’octòbre, la vila d’Agen serà lo luòc de convergéncia de las lengas e culturas regionalas de l’estat francés. L’eveniment, entitolat “Rescontres professionals de las lengas e culturas regionalas”, es coorganizat pel departament d’Òlt e Garona, la comuna d’Agen e la region Nòva Aquitània. Pendent dos jorns, de lengas coma lo breton, l’alsacian, lo catalan, los creòls, e plan d’autras, ressonaràn dins lo país occitan, en celebrant aital la diversitat lingüistica.
Aquel eveniment de la portada estatala es iniciat per Marcel Calmette, conselhièr departamental d’Òlt e Garona encargat de las lengas d’aquela circonscripcions administrativa, e Jean-Luc Armand, conselhièr regional de Nòva Aquitània encargat de las lengas e culturas dichas “regionalas” e president de l’Ofici Public de la Lenga Occitana (ÒPLO). Totes dos an amassat las tres entitats que representan e que las an jonchas d’associacions occitanas localas, membres del collectiu Quinzena Occitana, per prepausar doas jornadas d’escambis, de reflexion, de trabalh e de rencontres a l’entorn de las culturas e lengas autoctònas. Info / Jornalet .