L’Associacion Aquí l’Òc, consagrada a la promocion de la cultura occitana, festejarà dissabte que ven, 14 d’octòbre, son desen anniversari pendent una jornada especiala a Sant Seren.
L’eveniment començarà a 14h a la mediatèca, ont Sèrgi Carles presentarà son libre Istòria d’un salvatjon publicat per Letras d’Òc. Puèi, de 16h30 a 17h30 a l’auditòri, Alain Raynal abordarà lo tèma de l’ensenhament de l’occitan, de la Lei Deixonne a la Lei Molac. En seguida, d’escolans presentaràn al public lors òbras per tal d’illustrar la question de l’ensenhament de la lenga nòstra.
A 18h30, rendètz-vos a la sala polivalenta per un aperitiu cantat, que mesclarà tradicion e creacion, seguit d’una restauracion sus plaça, e a 21h i començarà un balèti animat pels Menestrièrs del Massís Central e Cal Caminar.
I aurà un espaci de beguda, un taulièr de libres e de produches culturals aital coma un diaporama de fòtos que descriuràn los 10 ans de l’associacion.
Aquí l’Òc es una associacion que son sèti es a Sant Seren (Limarga) e que sa tòca es de promòure e desvolopar la lenga e la cultura occitanas dins lo nòrd de Carcin. Tanben sosten l’escòla Calandreta l’Esquiròl. Vila de l’escrivan Pèire Brayac, Sant Seren sèrva de nombroses locutors d’occitan qu’an popat la lenga al brèç, e mai aculhís de corses d’occitan per adultes en mai de las classas d’occitan dins doas escòlas publicas, un collègi e un licèu.
La jornada del desen anniversari es organizada en collaboracion amb la comuna de Sant Seren, la DRAC de la region dicha Occitània, e l’Institut d’Estudis Occitans regional e departamental. Info : Jornalet
Per mai d’informacion e de reservacions:
+33 (0)6 73 62 64 63 / asso.aquiloc@gmail….
Podètz tanplan vesitar lo sit internet d’Aquí l’Òc e son grop de Facebook fòrça actiu.