Ven d’espelir lo 6n volum de l’Istòria de la cosina catalana e occitana (Historia de la cuina catalana i occitana) de Vicent Marqués a las edicions Sidillà de la Bisbal d’Empordà. ISBN: 978-84-127308-2-1. Se pòt aisidament far venir de la librariá catalana de Perpinhan: La Llibreria catalana, Plaça Joan Peyrà, 66 000 Perpinyà. Se pòt comandar en linha a info@llibreriacatalana.cat.
Aqueste 6n volum testimònia de la regularitat del trabalh de Vicent Marqués e de l’editor que an per objectiu de ne publicar dètz tòmes que seràn un cap d’òbra per la cultura occitana. Jamai s’es pas vist una tala soma a despart per Occitània de l’Histoire Générale du Languedoc dels monges Dom Devic e Dom Vayssette. Jamai una tala recèrca dins lo domeni cultural aqueste es estada menada amb tant de vam. E los volums de Vicent Marqués devon èsser dins totas las bonas bibliotècas d’Occitània. Basta pas de parlar de cultura e de cosina sens aver aqueles joièls que Vicent Marqués fa remontar de fonts prigondas.
Las cosinas catalana e occitana son cosinas sòrres. Las relacions istoricas, lingüisticas e culturalas entre los dos grands territòris, e tanben lo fach de viure dins una tèrra amb un passat e de condicions climaticas que se semblan an butat a la creacion d’una de las melhoras cosinas del Monde, amb de caractèris pròpris que tre l’Edat Mejana se van trobar dins diferents libres de recpètas e manuals ont se compilavan e se preservavan. Vicent Marqués a dedicat tota la siá vida a apialar l’istòria d’aquesta cosina. Dins aquel seisen volum nos dona de centenats de monografias, de recèptas de polalha, de conilh e de caça. Es que Vicent Marqués non solament nos explica las recèptas mas nos dona tanben l’istòria de las recèptas, e un estudi filologic, literari e cultural dels plats que fan lo còrpus de la cosina que partejam, nosautres, femnas e òmes dels Païses Catalans e d’Occitània. Info / JORNALET
MARQUÉS, Vicent. Història de la cuina catalana i occitana (volum 6). Edicions Sidillà, 2023. 904 paginas. 35 èuros. (veire volumes precedents).