Lo Musèu de Sant Ramon de Tolosa dobrirà una fenèstra sus l’istòria captivaira dels “bons òmes e bonas femnas” amb una exposicion inedita entitolada “Catars: Tolosa dins la Crosada”. Aquela exposicion descriurà los eveniments marcants de la crosada contra los albigeses (1209-1229), en explorant tanben la question de l’eretgia dicha catara. Los tèxtes de l’exposicion auràn una version en occitan.
Presentada dins dos sits tolosans prestigioses, lo Musèu de Sant Ramon e lo Convent dels Jacobins, l’exposicion metrà en lum près de 300 objèctes remarcables. Demest eles, i aurà de documents d’archius excepcionals prestats per d’institucions famosas talas coma la Bibliotèca Nacionala de França e los Archius Nacionals, d’artefactes arqueologics inedits, d’òbras escultadas e pintadas, aital coma de materials de reconstitucion istorica de qualitat scientifica, compreses de vestits e d’armament de l’epòca.
Los vesitaires auràn l’escasença d’enriquir lor experiéncia gràcias a de dispositius sonòrs, numerics e interactius, en ofrissent una immersion totala dins aquel periòde crucial de l’istòria d’Occitània. Lo dispositiu ludic Trobador convidarà lo public a compausar sa pròpria cronica de la crosada contra los albigeses, en ajustant una dimension participativa a aquela exposicion immersiva.
Info / Jornalet
Podètz trobar d’entresenhas sul sit del Musèu de Sant Ramon.
