Aqueste dissabte passat, l’Ostal Occitan Narbonés a bravament festejat son 10n anniversari amb totplen d’animacions. Dins aqueste editorial, lor volèm desirar un bon anniversari en esperant qu’aqueste primièr decenni serà lo començament d’una longa vida consagrada a far viure l’injustament mespresada cultura autoctòna del país e a la far venir de mai en mai populara.

Dins un Mond totjorn que mai globalizat, dominat per l’immediatesa e la virtualitat d’Internet, d’endreches coma l’Ostal Occitan venon d’espacis de resisténcia, ont la cultura populara pòt viure luènh de las pressions mercantilistas e de las dinamicas del public que s’impausan dins lo domeni numeric. Los locals d’aquela mena, sovent gerits per d’associacions localas, son de centres de vida, ont las personas se pòdon rescontrar, pòdon aprene, partejar lors inquietuds, manténer viu lo biais popular de comprene la cultura del país.

L’importància d’aqueles espacis fisics a l’èra d’Internet es cruciala. E mai los mèdias socials nos permeten d’èsser mai connectats que jamai, aquela connectivitat es sovent superficiala e despersonalizada. O sabèm ben la còla de Jornalet; trobam fòrça de manca aquela umanitat de las emocions, las idèas e las experiéncias que se partejan dins aqueles locals. A mai, los centres culturals entretenon una relacion intima amb lo terraire: promòvon la lenga del país, las tradicions popularas e las expressions artisticas, en balhant de vida a una identitat que fòrça conciutadans nòstres cèrcan, una identitat que resistís a l’omogeneïzacion de l’estat jacobin e del pervèrs mercat mondial globalizant.

Per tant, mai enlà de saludar la brava còla de l’Ostal Occitan Narbonés, volèm tanplan saludar totes los ostals occitans de long del país e totes los establiments, valent a dire los centres culturals, los ostals d’associacions occitanistas, las librariás, los estanquets, las escòlas Calandreta e totes aqueles sits sortits de la basa amb lo sosten del pòble qu’an establit d’espacis ont far viure la lenga. Totes aqueles endreches, dont l’Ostal Occitan Narbonés, son, de segur, a l’origina d’un bon malhum d’espacis que nos ajudaràn a viure l’identitat occitana amb un pauc mai de normalitat.   Editorial de Jornalet