Israèl expulsèt dimars passat l’activista suedesa Greta Thunberg dins un vòl devèrs son país d’origina amb escala a l’aeropòrt Charles de Gaulle de París, après sa detencion a bòrd del vaissèl Madleen que voliá portar d’ajuda umanitària a Gaza. Thunberg, e tres autres activistas dels dotze que navigavan sul Madleen, acceptèron d’èsser fòrabandits sul pic. Als quatre lor s’es defenduda l’intrada en Israèl pendent 100 ans.
Los autres uèch activistas refusèron de signar los documents de fòrabandiment que lor fasiá reconéisser qu’èran intrats illegalament. Demest los detenguts se tròba lo capitani del vaissèl, Riva Viard, e l’eurodeputada francesa d’origina palestiniana Rima Hassan. Segon las autoritats israelianas, « aqueles que voldràn pas signar de documents d’expulsion e abandonar Israèl seràn menats davant una autoritat judiciària ».
Los activistas los an menats al centre de detencion de Givon per « residents illegals » a Ramleh, ont après 4 jorns de detencion poiràn èsser fòrabandits amb o sens lor consentiment.
Nos sequestrar dins d’aigas internacionalas
A son arribada a l’aeropòrt parisenc, Thunberg acusèt Israèl de « sequestrar [l’esquipatge] dins d’aigas internacionalas » e soslinhèt que son experiéncia de detencion e expulsion èra « pas res en comparason amb çò que patisson los palestinians”.
Lo vaissèl Madleen, de pabalhon britanic, foguèt interceptat diluns dins d’aigas internacionalas. La nau ensajava de rompre lo blocatge naval impausat a la lista de Gaza en i portant un cargament simbolic d’ajuda umanitària —coma de lach per enfantons, de ris e de medicaments— amb la tòca de denonciar la crisi umanitària.
Israèl manten lo blocatge naval sus la lista de Gaza dempuèi 2007, quand l’Hamàs ganhèt las eleccions e comencèt d’administrar lo territòri.
Dempuèi lo començament de l’agression actuala, jos l’escampa de venjar lo violent atac massís e las presas d’ostatges del 7 d’octòbre de 2023, las autoritats de la lista comptan mai de 54000 mòrts palestinians. Mentretant, la comunautat internacionala avertís d’un risc imminent de famina entre la populacion gazauí.