Carcassona: un centenat de manifestants an cridat «Gardarem los Castèls Catars»
Lo collectiu País Nòstre denóncia «una volontat d’escafar la memòria de las victimas en privilegiant lo raconte dels opressors»
Un centenat de manifestants cridèron «Gardarem los Castèls Catars» dissabte passat, 7 de febrièr de matin, davant la bastissa del conselh departamental d’Aude, a Carcassona. La polemica es estada lançada après la volontat del conselh de cambiar l’apellacion “Castèls Catars” per la de “Fortalesas Reialas” dins lo dorsièr presentat a l’UNÈSCO.
Durant l’acamp i aguèt divèrsas presas de paraula: Joan Pèire Laval per País Nòstre, Joan Francés Laffont, president de Convergéncia Occitana; Domenge Drouet, de Bolegadís; Joan Pèire Bérou, de l’associacion Catars e Protestants, Joan Luc Davezac, de Bastir Occitània; Toni Strubell, de l’Assemblada Nacionala Catalana, e Felip Bonnet del Partit de la Nacion Occitana.
Lo recampament s’acabèt amb la lectura d’un tèxt de sosten de Claudi Martí, seguida d’una cançon de Renat Nelli interpretada per Gérard Zuchetto.
Es presvist de portar la revendicacion a la commemoracion annadièra de la presa del castèl de Montsegur lo 16 de març que ven.