En vista de las municipalas, vint e doas associacions amassadas dins lo collectiu Montpelhièr l’Occitana demandan d’engatjaments concrets als candidats per afortir la preséncia de la lenga occitana dins l’espaci public e a l’escòla
A l’apròchi de las eleccions municipalas a Montpelhièr, un vintenat d’associacions an decidit d’unir lors fòrças per defendre la lenga occitana, çò rapòrta Ici. Amassadas dins lo collectiu Montpelhièr l’Occitana, interpèlan los candidats per qu’intègren d’engatjaments concrets al benefici de la lenga e de la cultura occitanas dins lors programas.
«L’occitan es en dangièr, es l’UNÈSCO qu’o ditz», çò ramenta Sebastian Loesener, representant de la federacion Calandreta d’Erau. Lo collectiu formula sièis proposicions; demest elas, la formacion d’agents municipals a l’occitan, per fin que lo personal de las bibliotècas, de l’ofici de torisme, de las grépias o de las escòlas mairalas pòsca aculhir lo public en aquela lenga. Las associacions demandan tanben una mai granda visibilitat de l’occitan dins l’espaci public: senhaletica bilingua pels noms de carrièras, anóncias traduchas dins lo tram, o encara un sosten acrescut a las estructuras culturalas occitanas.
La creacion d’una quatrena escòla Calandreta figura tanben demest las prioritats. A la calandreta dau Chivalet, situada dins lo quartier d’Estanova, près del Mercat Tropisme (espaci cultural e creatiu de Montpelhièr), los escolans de CM1 e CM2 repetisson actualament, en occitan, lo tradicional jutjament de Caramentrant, previst lo 29 de març a la Passejada del Peiron.
info / JORNALET