Uèi, 4 de març de 2026, fa cinquanta ans qu’aguèron luòc los eveniments tragics de Montredon, en Corbièras, un episòdi que marquèt prigondament l’istòria sociala e viticòla de Lengadòc. Lo 4 de març de 1976, los afrontaments entre vinhairons en lucha e las fòrças de polícia (CRS) virèron al drama: doas personas i perdèron la vida, lo vinhairon Emile Pouytés e lo comandant CRS Joël Le Golf, e i aguèt fòrça nafrats. Aquel jorn foguèt lo ponch culminant d’una mobilizacion que denonciava la davalada dels prèses del vin e las importacions massissas, dins un clima de repression ordenat pel ministre de l’Interior d’alara, Michel Poniatowski.
«Viure e trabalhar al país»
La lucha dels vinhairons se resumissiá jos la devisa «Viure e trabalhar al país», que venguèt un simbòl de las revendicacions socialas e territorialas d’aquela epòca. Après la tragèdia, lo movement s’aflaquiguèt brutalament, mas Montredon demorèt un simbòl fòrt de resisténcia e de memòria collectiva.
Commemoracion dimenge que ven
Per marcar aquela efemerida, una jornada de commemoracion es organizada aqueste dimenge 8 de març de 2026 a Montredon. La commemoracion començarà a 11h amb un acamp de memòria e de reculhiment. Lo sindicat dels vinhairons d’Aude i convida la populacion e prevei tanben una taulejada de miègjorn. Lo repais, accessible sonque sus inscripcion prèvia, es ja complet dempuèi la dimenjada.
Lo movement occitan País Nòstre a anonciat que seriá present, e apèla a reprene lo crit istoric de «Volèm viure, trabalhar e decidir al país».
Info / JORNALET