Uèi fa 782 ans qu’aguèt luòc la desfacha del darrièr sit de resisténcia de la guèrra de 1209-1244, quand l’armada francesa, amb lo sosten del Vatican, envasiguèt una partida d’Occitània jos l’escampa de combatre una eretgia. Lo 16 de març de 1244, de matin, l’armada francesa cremèt 210 personas dins un grand lenhièr. Uèi, al Prat dels Cremats, i a una estèla commemorativa dedicada a aquelas victimas: “Als catars, als martirs del pur amor crestian”. Coma cada an, s’organiza de recampaments per o commemorar
Uèi, a partir d’11 oras s’amassan a l’estèla del Prat dels Cremats divèrsas organizacions occitanistas dont Convergéncia Occitana, l’Institut d’Estudis Occitans d’Arièja, lo Cercle Occitan del País d’Òlmes, lo movement País Nòstre e lo Partit de la Nacion Occitana. L’eveniment comprendrà d’omenatges, d’intervencions musicalas, poeticas e cantadas, e vòl èsser a l’encòp un moment de remembrança e de transmission d’aquela memòria istorica. I participaràn tanben d’entitats coma lo Cercle d’Afrairament Occitanocatalan, vengut de Barcelona, e Bastir Occitània. Las commemoracions contunharàn dimenge 22 de març amb una nòva amassada al meteis endrech, per refortir l’engatjament de manténer viva la memòria dels faches de Montsegur e de remembrar qu’aquela istòria non la desmembram pas.
Projeccion de Bogre a Tolosa
Lo filme Bogre, la granda eresia europèa, del realizaire occitan Fredo Valla, se projectarà dimècres 18 de març a 20h al cinèma Utopia, al quartièr tolosan de Bòrdaroja, amb un debat animat per Patrice Teisseyre, jornalista e coautor amb Michel Roquebert del Diccionari del catarisme (edicions Privat). Una taula de libres sul catarisme serà assegurada per la Tuta d’Òc, la librariá occitana de Tolosa.
Bogre es un excellent documentari de tres oras qu’assabenta de la crudèla persecucion dels catars e de sas consequéncias umanitàrias. Lo filme es en cinc lengas —bulgar, francés, occitan, italian e bosnian— e se distribuís amb de sostítols dins caduna d’aquelas cinc lengas e en catalan. Es produch per la Chambra d’Òc amb lo sosten especial del CIRDÒC.
Info / Jornalet