Una delegacion del partit politic Regions e Pòbles Solidaris (R&PS) foguèt recebuda divendres passat, 19 de setembre, al palais parisenc de Matinhon pel primièr ministre francés, Sébastien Lecornu. L’amassada, que durèt una ora, èra menada pel president de la federacion, l’eurodeputat còrs François Alfonsi.
De la delegacion fasián partida lo deputat basco Peio Dufau, lo deputat breton Paul Molac, lo president d’Unser Land, l’alsacian Jean-Georges Trouillet, e lo director de R&PS, l’occitan Pèire Costa.
Segon lo comunicat de l’organizacion, la reünion marca una estapa novèla dins la reconeissença de las idèas autonomistas, que ganhan de terren dins l’estat francés, coma o mòstra una enquista de l’IFOP publicada en agost.
Los escambis portèron sus mai d’un ponch:
- la necessitat d’una descentralizacion mai fòrta e d’un poder mai clar per las collectivitats localas, per exemple en Bascoat nòrd;
- la reculada de l’estat francés dins l’aplicacion de la Lei Molac sus las lengas minorizadas;
- lo procès d’autonomia en Corsega, actualament en debat al Parlament;
- las prioritats budgetàrias, amb la critica d’una concentracion dels investiments dins de grands projèctes estatals, coma las linhas TGV, al detriment dels territòris.
Segon R&PS, lo primièr ministre francés mostrèt una actitud d’escota e prenguèt en consideracion los resultats del sondatge en favor de reformas territorialas ambiciosas. Confirmèt tanben sa volontat de menar a bon tèrme lo camin cap a l’autonomia de Corsega, en defendent un metòde basat sus de consenses locals.
En conclusion, Lecornu prepausèt de perseguir los escambis amb R&PS per tornar pensar las relacions entre l’estat francés e la diversitat de las realitats territorialas dins la Republica.