Radio Occitania recebuda per lo Conselh regional d’Occitania

https://www.francetvinfo.fr/image/75iu8ta0r-c4a2/1200/450/15151815.jpg

Adieussiatz, d’en primièr mercés pel vòstre sosten que faguèt pataquejar lo còr a la còla tota de Ràdio Occitania, tant coma la mobilisacion vòstra.
Semblarià que tot aquò menèt a una capitada.
D’efièit, una part de la direccion de Radio Occitania es estada recebuda pel cap de cabinet de Na Carola Delga, presidenta de la region Occitanie Pyrénées-Méditerranée, en preséncia del director de l’OPLO.
Semblarià qu’aprèp d’unas demarchas administrativas, la situacion se podrià destibar.

Ràdio Occitania s’en torna encara mai motivada.
Aquela « crisi » nos a tanben menats a soscar a de projèctes d’espandiments a tèrmes cort, miègjan e long.
En mai d’aquò, avèm escambiat amb los autres mèdias occitans, pertocats eles tanben per de baissas de subvencions.
Nos anam lèu recampar per establir un plan de desenvolopament per l’ensem dels mèdias occitans.
L’idèa, plan solide, n’essent pas de fondre tot, se que non d’amplificar la sinergia ja presenta en tèrmes d’escambis en tot gardant l’identitat pròpria de cada mèdia.
Sortirá d’aqueles escambis un projècte de desvolopament abodat als mèdias de lenga occitana.

Sometram apuèi aquel projècte als partenaris financièrs, dins l’amira de vèire espelir una politica especifica als mèdias, aquela que cridam dels nòstres voses dempuèi ja un fum d’annadas.
Demandarèm aital una presa en compte vertadièra dels projèctes, tant coma dels besonhs dels mèdias occitans, aital que la nominacion d’un(a) interlocutor/tritz especific(a) a las problematicas mèdiaticas emai una linha budgetaria abodada als mèdias.
L’idèa essent, al final, de poder bastir un projècte en partenariat amb los representants de l’ensem dels mèdias, las regions e d’autres finançaires potencials.
D’efièit, se l’ensenhament es plan segur una prioritat, la transmission e l’usatge « normal » de la lenga tant coma usitada dins los nòstres mèdias respectius, son mai que fondamentals per la subrevida de la lenga e de la cultura occitanas.

Mancarèm pas de vos assabentar de la perseguida d’aqueles projèctes.

En mai d’aquò, lo micrò de Ràdio Occitania demòra dubèrt a totes los que desiran desfendre de projèctes, assabentar lo mond de problematicas, d’avançadas o de dificultats o tot simplament s’exprimir en occitan sus quin subjecte que siague.
Enfin, en seguida de mantuns retorns que son estats exprimits, joslignant l’incompreneson dels ciutadans rapòrt a las actions de l’OPLO, nos tenèm, tant coma los autres mèdias, a la dispausicion dels sòcis de l’Ofici Public de la Lenga Occitana se desiran comunicar sus çò que fan.

Un còp mai, mercés plan pel sosten e la mobilisacion granda.

Es a totes que farèm tot !

La còla de Radio Occitania.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*