En preséncia notadament de Charline Claveau-Abbadie, Presidenta de l’Ofici public de la lenga occitana, Conselhièra regionala de Novèla-Aquitània, e de Patric Roux 1ièr Vice-president de l’Ofici public de la lenga occitana, Conselhièr regional d’Occitania.
LANÇAMENT D’UNA ENQUÈSTA SOCIOLINGUISTICA DEDICADA A LAS PRACTICAS E LAS REPRESENTACIONS DE LA LENGA OCCITANA AUPRÈS DE 8 000 PERSONAS.
Quau son los qui parlan occitan ? Quant son ? Perqué utilisan la lenga occitana ? Coma l’an aprèsa ? E la transméten e perqué ? Que’n pensan los qui ne la parlan pas ? Autant de questions a las quaus l’Ofici public de la lenga occitana tend a menar responsas en tot lançar una enquèsta sociolinguistica màger, en partenariat damb l’Euroregion Novèla-Aquitània/Euskadi/Navarra.
Un territòri d’enquèsta transfrontalèir
Aquera enquèsta quantitativa pòrta sur la transmission, los usatges e las representacions de la lenga occitana sus un espaci larg :
- en França, sus los territòris occitanofònes de Novèla-Aquitània e Occitania, sia 22 departaments
- en Espanha, en Val d’Aran.
Au cap de la prima de 2020, las resultas reculhidas permeteràn d’actualisar e de comparar las donadas de las enquèstas menadas en 2008 e 2010 en ex-Aquitània e ex-Mieijorn-Pirenèus. Ofriràn atau per lo purmèir còp donadas armonisadas a l’escala d’un territòri gran e transfrontalèir.
Un panèl de 8 000 personas
Per conéisher la situacion de l’occitan, aqueth projècte a grana escala es hidat, capvath un mercat public, a un prestatari especialisat alara que las òbras s’amodèren tre genèir de 2020.
8 000 personas seràn atau interrogadas sus la lor coneishença de l’occitan, practica e representacion de la lenga nòsta. Los escambis telefonics seràn iniciats en françés/espanhòu, pui perseguits en occitan, per los que se declaran mestrejar la lenga, per fin d’atestar la lor occitanofonia.
L’implicacion de l’Euròpa
Lo projècte es estat cofinançat a la nautor de 65% per los Hons Europeencs de Desvolopament Regionau (FEDER), capvath lo Programa Interreg V-A Espanha-França-Andòrra (POCTEFA 2014-2020), dens l’encastre deu projècte IRAKASLEGIAK. L’objectiu deu POCTEFA es de renforçar l’integracion economica e sociau de l’espaci frontalèir Espanha-França-Andòrra. Son ajuda es concentrada sus lo desvolopament d’activitats economicas, sociaus e environamentaus transfrontalèiras per lo biais d’estrategias conjuntas que favorisan lo desvolopament durable deu territòri.
Projet cofinançat per lo FEDER
Informacion mei sus www.ofici-occitan.eu
Contacte premsa : Florie RICHARD / florie.richard@ofici-occitan.eu – 09 82 54 99 15
Creat en 2016, l’Ofici public de la lenga occitana (OPLO) es un Gropament d’interés public vasut d’una conviccion partatjada per l’Estat (ministèri de l’Educacion nacionau e ministèri de la Cultura) e las Regions Novèla-Aquitània e Occitania : renforçar e mutualisar las politicas partenariaus menadas en favor de la lenga occitana. Lo camp d’accion d’aquera aisina interregionau e inter academica, es la politica linguistica partenariau.