Coma o publicàvem dimars passat, Midi Libre s’engatja per la defensa de l’occitan. Un editorial del cap-redactor Olivier Biscaye remembrava als legeires d’aquel jornal occitan d’expression francesa que “defendre l’occitan es protegir nòstre patrimòni lingüistic e nòstre tresaur nacional” e qu’aquò “es la mission de cadun de nosautres”. Per ansin, Midi Libre a dobèrt lo debat e dona la paraula als ensenhaires, als parents e als legeires en lor demandant qu’escrigan lors vejaires al cap de redaccion a redac.chef(a)midilibre.com.
Un dels comentaris de nòstre article recordava l’evolucion de Midi Libre a respècte de l’occitan, que passèt d’èsser contrari al reviscolament de la lenga a l’epòca de las mobilizacions en Larzac a publicar una tribuna setmanièra en occitan e, ara, a afortir son engatjament e donar la paraula a l’occitanisme. D’efièch, en octòbre de 2019, Midi Libre comencèt de publicar una cronica setmanièra en occitan, signada per Joan-Loís Blenet, qu’es totjorn publicada dins una pagina prestigiosa, al costat de las tribunas de cronicaires reputats, e sens cap de traduccion. A mai, Olivier Biscaye faguèt un editorial per saludar l’arribada de l’occitan al jornal.
Es verai que l’occitan se tròba dins una situacion fòrça critica e, franc de la Val d’Aran, es pas pus una lenga de comunicacion sociala. Totun, la creacion culturala en occitan es impressionanta e tanben cal soslinhar que la lenga nòstra es una de las lengas minorizadas d’Euròpa qu’an mai de literatura e d’estudis lingüistics faches a totas las epòcas de son istòria. A mai, l’enquista sociolingüistica realizada per l’Ofici Public de la Lenga Occitana (ÒPLO) dins l’oèst d’Occitània mòstra que lo 90% dels abitants vòlon/volèm de politicas lingüisticas per l’occitan. Per tant, avèm lo primièr dels elements clau pel recobrament de la lenga: que lo pòble la vòlga recobrar.
L’iniciativa de Midi Libre demòstra que la societat es fòrça mai avançada que los politicians quand a consciéncia de la diversitat lingüistica, de la lenga occitana e de nòstra identitat culturala. A mai, lo jornal nos prepausa l’arma mai poderosa: la paraula. Parlem! A las plumas, occitans! Saludem l’iniciativa de Midi Libre e escrigam a redac.chef(a)midilibre.com.
Editorial de Jornalet