Après aver recobrat lo nom Estivada, l’associacion independenta La Gardarem a decidit de relançar aquela celebracion amb la tòca de reviudar l’esperit d’un festenal panoccitan, interregional e popular. Aquela iniciativa novèla, que portarà lo nom de Nòv’Estivada, a per mira d’èsser lo rendètz-vos annadièr de la creacion artistica e culturala occitana dins tota sa diversitat, aital coma un forum per de debats collectius sul present e sus l’avenidor.
Amb de ressorsas limitadas mas una determinacion granda, l’associacion a capitat a organizar un festenal-forum los 26 e 27 julhet venents a Sebasac, a las pòrtas de Rodés. Aquela edicion istorica serà una oportunitat d’amassar un còp de mai totes los que desiran de manténer aquel moment de fèsta e de rescontre, essencial per la promocion e la reconeissença de nòstra identitat occitana delà las regions e las frontièras.
Per i arribar, cal lo sosten de totes, coma o an ja demostrat dempuèi las modèstas debutas de l’aventura arunan. Aquí perqué fan una crida a difusar al maximum l’aficha, la programacion e la comunicacion a l’entorn de la Nòv’Estivada, aital coma a jónher l’associacion La Gardarem, per n’assegurar l’independéncia financièra maximala possibla, o a se mobilizar coma benevòls.
A mai, es prepausat de consagrar una zòna del festenal a la creacion d’un « Canton Mèdias », ont los mèdias poiràn dispausar d’un espaci de trabalh e mostrar lor vitalitat dins la difusion de nòstra lenga per la ràdio, Internet e d’autras plataformas.
L’Estivada nasquèt en 1995 e aguèt luòc dins la capitala roergassa fins a 2022. Après una gestion per la comuna de Rodés de 2015 enlà, lo cònsol màger de la vila, Christian Teyssèdre, anoncièt l’an passat una reformulacion del festenal que lo desoccitanizava completament.
Info / Jornalet