Carrièras Occitanas s’engatja dins lo final de La Passem a Anglet
Lo collectiu occitanista portarà lo ligam al km 2108 e i passejarà l’ostal de Joan Petit dins una jornada festiva amb d’animacions e de concèrts
La corsa de relèus per la lenga occitana La Passem arribarà a son tèrme lo dissabte 9 de mai après dètz jorns de mobilizacion en percorrent Gasconha tota. Per aquesta darrièra jornada, l’associacion Carrièras Occitanas serà presenta a Anglet en portant lo ligam al quilomètre 2108 de la corsa.
L’eveniment se tendrà sul Pòrt de Plasença de l’Estacada, ont los participants son convidats a se retrobar a partir de 18h. L’objectiu serà de bastir l’ostal de Joan Petit abans de jónher la corsa cap a 18h45, dins una atmosfèra festiva e revendicativa en favor de la lenga occitana.
Aquesta participacion serà tanben l’escasença per Carrièras Occitanas de tornar metre en valor l’ostal de Joan Petit, simbòl ja conegut de la darrièra mobilizacion a Vilafranca de Roergue, e d’anonciar una novèla jornada d’accion prevista pels 17 e 18 d’octòbre que venon.
Tot long de la jornada, lo sit aculhirà d’animacions variadas, amb mercat, espectacles e concèrts. Demest los grops anonciats i a A tot vedent, Tust, Karnahas e Galactic Aulhèrs, que participaràn a far d’aquela fin de corsa un moment de celebracion collectiva.
Amb aquela arribada festiva a Anglet, La Passem clavarà una novèla edicion marcada per l’implicacion de centenats de personas e d’estructuras, confirmant la vitalitat del movement per la lenga e la cultura occitanas.
Una vertadièra capitada populara e militant
Organizada per l’associacion Ligams, La Passem ocupa una plaça de mai en mai importanta dins lo combat per l’occitan. Lançada en 2018 en Gasconha, aquela corsa de relèus per l’occitan s’inspira dirèctament del Korrika e del Redadeg. Organizada cada dos ans, percor mantuna centena de quilomètres sens interrupcion pendent mantun jorn, en religant vilatges e vilas a l’entorn d’un messatge al benefici de la lenga occitana. Al fil de las edicions, s’es impausada coma una vertadièra capitada populara e militant, en confirmant que l’occitan a encara la capacitat de mobilizar largament las gents. L’edicion d’ongan començarà lo 30 d’abril venent e se perseguirà fins al 9 de mai, en percorrent 2000 km e en traversant diferents territòris gascons, de Bedós (Vath d’Aspa) a Anglet (Baish Ador).
FERRIOL MACIP JORNALET del 20 d’abril de 2026