L’estat espanhòl perseguís Directa e Vilaweb per aver revelat d’infiltracions policièras
L’AEPD prepausa de multar los dos mèdias amb 7000 èuros e de los obligar de retirar una partida de las informacions. Fòrça organizacions denóncian una ataca grèva a la libertat d’informacion
Tèxte legit
L’Agéncia Espanhòla de Proteccion de las Donadas (AEPD) —autoritat administrativa de l’estat espanhòl encargada de velhar al respècte de la legislacion sus la proteccion de las donadas personalas— a entamenat un procediment sancionador contra los mèdias catalansDirecta, especializada en jornalisme d’investigacion, e Vilaweb, un dels principals jornals numerics en catalan, per aver raportat las infiltracions de policièrs espanhòls dins de movements socials e independentistas catalans. L’organisme prepausa una emenda de 7000 èuros contra cada mèdia e exigís lo retirament d’una partida dels contenguts publicats, una decision que fòrça jornalistas e organizacions considèran coma una grèva menaça contra la libertat d’informacion.
Lo cas ten son origina de las enquistas publicadas per Directa, que revelèron entre 2022 e 2023 l’existéncia d’almens quatre agents de la Polícia Nacionala infiltrats jos d’identitats falsas dins d’associacions e de movements socials de Catalonha e del País Valencian, sens autorizacion judiciària. Aquelas revelacions aguèron una granda repercussion politica e menèron lo govèrn espanhòl a reconéisser que los agents avián agut l’estatut d’«agents d’intelligéncia», una figura que dispausa pas del contraròtle judiciari previst pels agents encobertats.
Pasmens, l’AEPD sosten que la publicacion de fotografias parcialament amagadas, dels noms fictius utilizats pendent las infiltracions e d’autras donadas contraven a la legislacion sus la proteccion de las donadas personalas. Ambedós mèdias replican que foguèt una informacion d’interès public evidenta e indispensabla per demostrar l’existéncia de las infiltracions.
Lo jornalista Jesús Rodríguez, de Directa, qualifica la decision de «censura», mentre que lo director de Vilaweb, Vicent Partal, parla d’una «agression sens precedent contra la libertat de la premsa» e se ditz prèst per depausar un recors davant las instàncias europèas se cal.
L’associacion pels dreches umans Irídia e lo Grop de Jornalistas Ramon Barnils avertisson que la menaça de multas e l’obligacion de retirar d’articles pòdon crear un efièch coercitiu sus totes los mèdias. Segon eles, la procedura s’apròcha del tèrme anglés SLAPP, çò es un litigi intimidador, una accion en justícia que cèrca d’intimidar e de far calar los jornalistas que revèlan d’informacions d’interès public.
La procedura poiriá durar aperaquí un an abans una decision definitiva. Mentretant, de desenas d’organizacions professionalas, de sindicats, d’associacions pels dreches umans e de mèdias an manifestat lor sosten als dos jornals, en avertissent que l’afar pertòca pas solamentDirecta e Vilaweb, mas lo drech de tota la societat d’èsser assabentada de l’accion dels poders publics.
Jornalet se mòstra tanben chepicat e manifèsta son sosten a sos confraires catalans de Directa e Vilaweb.