Manifèst del collectiu occitan Comuna! JORNALET

Lo collectiu occitan Comuna! ven de publicar suls rets socials un manifèst entitolat Manifèst per un occitanisme revolucionari novèl, dins lo qual crida a renovelar en prigondor lo movement occitanista. Lo tèxt prepausa una lectura politica e sociala de la situacion actuala d’Occitània e defend un occitanisme anticapitalista, antifaissista e revolucionari, qu’assòcia la defensa de la lenga a las luchas socialas e a la transformacion de la societat.

 

Critica de l’occitanisme contemporanèu

 

Lo collectiu dreiça un bilanç critic de l’occitanisme contemporanèu, que jutja tròp institucionalizat e desconnectat de las realitats socialas del país. Denóncia la folclorizacion de la cultura occitana, aital coma lor embarrament dins d’espacis associatius e culturals que batalhan per tocar de novèls publics. Segon Comuna!, la dependéncia a las institucions e als finançaments publics a progressivament voidat lo movement de sa capacitat de contèsta e de transformacion sociala.

 

Carrièras Occitanas, l’emergénciad’unoccitanismenovèl

 

Lo manifèst pòrta pasmens un agach encoratjant sul movement Carrièras Occitanas, que considèra coma lo signe d’un novèl occitanisme, jove e dinamic, ancorat a esquèrra e antifaissista. Comuna! i vei l’emergéncia d’una generacion sortida en partida de las escòlas Calandreta e de las estructuras occitanistas, que cèrca d’ara enlà d’autras formas d’engatjament fòra dels quadres institucionals. Lo collectiu estima ça que la qu’aquel movement deu encara clarificar sos objectius e despassar la simpla preservacion de las estructuras existentas per s’inscriure dins un vertadièr projècte de transformacion sociala.

 

Renovelar l’occitanisme

 

Per concretizar aquel renovelament, Comuna! prepausa d’organizar son trabalh a l’entorn de tres aisses. Lo primièr consistís a tornar vesitar las teorias de l’occitanisme politic dels ans 1960 e 1970 per tal de las actualizar fàcia a las transformacions socialas. Lo collectiu desira tanben de desvolopar d’espleches de difusion, de podcastes, e remetre en valor las creacions musicalas e cinematograficas d’aquel periòde. Enfin, prepausa d’intervenir dins las luchas socialas, ecologistas e antifaissistas actualas, de la contèsta dels projèctes de linhas ferroviàrias de granda velocitat a la defensa de las campanhas, en i integrant la question de la dominacion nacionala e de l’autodeterminacion occitana.

Lo collectiu Comuna! foguèt fondat lo 14 de julhet de 2025 dins lo Bas Lengadòc, en seguida d’un apèl informal lançat qualques meses de per abans per crear un novèl Comitat Occitan d’Estudis e d’Accion, en referéncia a una organizacion occitanista dels ans 1960. Sos membres explican aver fin finala causit lo nom Comuna! per marcar lor volontat de s’emancipar de las estructuras grandas de l’occitanisme tradicional e afirmar lor engatjament revolucionari. Lo manifèst, redigit a Tolosa en 2025, constituís aital una primièra presentacion de lor cambada e de lor projècte politic.

 


Per mai d’informacions: comuna-oc(a)riseup.net

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*