Jornalet fa un pas de mai per se sarrar de sos legeires! Ara lo quotidian a son canal oficial a Telegram, ont poiretz recebre cada jorn las principalas nòvas en occitan dirèctament sul vòstre telefonet, tauleta…
Amb aquel canal, Jornalet vòl facultar l’accès a l’informacion en lenga nòstra e ajudar cadun a demorar connectat amb l’actualitat en occitan e a l’occitana. Los abonats i trobaràn los articles mai recents, de contenguts especials e de remembranças d’eveniments importantas per l’occitanisme.
Telegram es vengut un dels mejans mai utilizats per seguir los mèdias, gràcias a sa simplicitat e al fach que respècta la privacitat dels legeires. Es tanben un biais de se sarrar dels mai joves que s’assabentan de mai en mai per aquela mena de canal.
Per vos i marcar, es fòrça simple: basta de cercar @jornalet_oc dins l’aplicacion Telegram o de clicar sus aqueste ligam: https://t.me/jornalet_oc
Amb aquela nòva preséncia, Jornalet contunha sa mission de far viure l’occitan dins l’espaci numeric e de portar la lenga nòstra dins totes los cantons de la vida vidanta.