Los abitants de l’oèst d’Occitània vòlon majoritàriament de mèdias en occitan, e d’occitan dins los mèdias, e plan mai d’ensenhament de la lenga dins las escòlas. Dins aquel sens, l’81% son favorables al desvolopament d’una ofèrta d’ensenhament de l’occitan de la mairala al licèu. Aquelas donadas sortisson de l’enquista sociolingüistica realizada per l’Ofici Public de la Lenga Occitana (ÒPLO) dins las comunas occitanofònas de las regions dichas Occitània e Nòva Aquitània e dins la Val d’Aran.
Segon aquel sondatge es en Bearn, Gavaudan e Roergue ont la lenga ten mai de locutors —franc de la Val d’Aran—. Aqueles païses son los que tenon mai d’occitan dins las escòlas. De conclure doncas, que l’occitan a l’escòla es essencial a la subrevivéncia de la lenga, o que la subrevivéncia de la lenga es essenciala a l’ofèrta de l’occitan a l’escòla.
De notar que l’ÒPLO contribuís al desvolopament de l’occitan dins l’educacion amb de dispositius dedicats, en publicant de manuals escolars, en finançant lo doblatge de dessenhs animats e sèrias, en finançant de libres per joves, en organitzant de jornadas occitanas dins los collègis e licèus e amb de borsas pels estudiants e per la formacion dels ensenhaires.
INFO / JORNALET