Jos lo lèma “Per que viscan nòstras lengas” divèrsas manifestacions de divèrsas sòrtas se tenon uèi dins tot l’estat francés. Exigisson un estatut per las lengas autoctònas de l’estat francés autras que lo francés, l’extension de lor ensenhament e lor desvolopament dins l’espaci public.
La situacion d’aquelas lengas, dont lo nòstre occitan, es fòrça marrida. A mai, la darrièra reforma de l’educacion ne limita e desvaloriza brutalament l’ensenhament. “La vertat es que i a al Ministèri de l’Educacion de París una volontat evidenta de metre fin a l’ensenhament de la lenga nòstra”, çò planhiá arunan lo “Centre Regional dels Ensenhaires d’Occitan” de Tolosa.
En Occitània an anonciat de mobilizacions a Agen, Ais de Provença, Arle, Aurenja, Avinhon, Baiona, Bordèu, Carpentràs, Fois, Lemòtges, Marselha, Mont de Marsan, Narbona, Niça, Nimes, Orlhac, Pau, Sant Africa, Tolon, Tolosa, Vilanòva d’Òlt… A mai, a Grenòble manifestaràn quatre associacions occitanas e arpitanas. Sus la mapa que seguís trobaretz mai de detalhs e informacions sus las mobilizacions.
La mobilizacion seguís la crida del collectiu nomenat Per Que Viscan Nòstras Lengas, qu’amassa d’elegits e collectius dont las diferentas associacions d’ensenhaires de las lengas autoctònas e minorizadas de l’estat francés. En Occitània es la majoritat de collectius occitanistas que cridan a la mobilizacion dont la FÈLCO, Calandreta, l’IEO, lo Felibritge, Lo Congrès Permanent de la Lenga Occitana, l’Ostau Bearnés, País Nòstre, Macarèl … La redaccion de Jornalet avèm tanben cridat a manifestar nombroses per exigir un cambiament de las politicas etnocidas de l’estat francés.
INFO / JORNALET