L’idèa que cal sosténer las lengas regionalas camina bravament. Un vòte istoric au Senat lo 10 de decembre n’es la pròva bela.
Es un polit present de Nadau que nos ven d’ofrir lo Senat aqueste 10 de decembre. Un vòte istoric per son ample e sa qualitat. Una lei per las lengas regionalas votada amb 253 voses per e 56 en contra. E pas a la chut-chut, mas un escrutin public, mercés a Max Brisson dels Republicans. Cristian Bilhac, novèl senator d’Erau, i parlèt per son grop. Victòria grandassa maugrat lo Blanquer e lo vòte en contra tant dau PC coma dau partit dau govèrn. Èra la seguida per la lèi Molac votada en febrièr a l’Assemblada e ailàs voidada de son contengut d’ensenhament pel ministre.
Seguida possibla mercés au grop dels Verds. Amb un aprestament tactic finòt (la vida parlamentària es plena de rusas) e maugrat lo ministre se votèron d’avançadas bèlas. La reconeissença de l’immersion, l’egalitat amb lo Còrs per las lengas, es a dire lor ensenhament dins l’orari escolar normau. Tanben que lo prètzfach escolar siá pagat per l’escolarizacion bilingüa fòra de la comuna de residéncia, l’autorizacion de la senhaletica bilingüa amai la dels dels signes diacritics a l’estat civil. Uèi encara, la tilda de ñ es permesa s’avetz un nom espanhòl e enebida s’es breton ! Republicans, PS, Centristas, Independents e Verds votèron. Avèm de vent dins la vela. Novèl episòdi en abrieu a l’Assemblada. Ardit pichon !
J. L BLENET – MIDI LIBRE ( 20 / 12 / 2020 )